La Quotidiana dils 6 da schaner 2015
Vic Hendry ei morts a Schaffusa
(mc) Mo paucas jamnas suenter la mort da sia cara consorta Zaria ei era la flomma dalla veta dil scribent Vic Hendry sestizzada en siu 95avel onn. Cun sia ovra litterara voluminusa e multifara ha Vic Hendry relaschau passidas marcantas e restontas ella litteratura romontscha. Siu lungatg ei inconfundibels, el sa magari esser genuins e pulpius en ses emprems romans, denton era gigins e strebels en sias historias cuortas. Pliras da sias ovras ein vegnidas translatadas en lungatgs jasters. Sia ovra publicistica astgass muntar a varga 7000 paginas. E quei tut a pèr cun las obligaziuns da famiglia e clamada da scolast secundar, gl'emprem a Camischolas ed allura 25 onns a Schaffusa. En renconuschientscha "da sia ovra litterara ordvart vasta ed impurtonta ed en undrientscha da ses gronds merets per la promoziun dil lungatg e dalla cultura dils Romontschs" ei Vic Hendry vegnius undraus 2001 cul Premi grischun da cultura e cun numerusas ulteriuras distincziuns. Per la pressa romontscha - cunzun per la "Gasetta Romontscha" e "La Quotidiana" ei il trapassau staus ina veta ora in appreziau ed attaschau collaboratur.
La sepultura dil defunct ha giu liug el stretg ravugl familiar.
Mira: En memoria

Beinvegni sin la pagina da nies scribent tujetschin Vic Hendry.

Sch'ins vul
La mort prematura da miu bab (quendisch onns) e la mort da mia sora veglia che veva 27, omisdus mortoris enteifer 10 meins, han bess umbrivas sill'olma d'in mattatsch. Ed aunc en in ambient da Maunsut, quei vul dir sil tratsch darschalaun dils umbrivauns, quei tut ei stau dabia e .... buca senza consequenzas. Ed ins di forsa cun in tec raschun che mias historias seigien plitost passas. Ils avdonts dalla pervesa ed arclina dattan vessamein els egls. Ei capeta che jeu scrivess magari bugen in tec pli legher. Ins sa buca scriver da quei ch'ins ei buc. Era jeu stoi esser sco jeu sun. - Percass che zatgi dumandass, nua che jeu stetti cun mes raquens, schess jeu che jeu stetti ni dretg ni seniester ni zanua permiezora, jeu mon per mias vias, dabot, per satiuer e rimnar quei ch'ils mes piardan dafertontier. Nuot auter. Miu stil, el seigi cuorts e nominals e sai jeu aunc tgei. Jeu mez quetel ch'ils accords che jeu audel tunien aschia. E ... l'ureglia ei mia.
GR 19-8-1980

Vic (Ludivic) Hendry 1920
El ei naschius ils schotg d'uost dils anno 1920; oravontut eis el staus Tuatschin e vischin da Cavorgia. Suenter la scola publica eis el ius giu Cuera e vegnius scolast; igl emprem ha el mussau en Tujetsch (a Selva, a Camischolas ed a Sedrun) e sissu ha el dau scola secundara el marcau da Schaffusa e quei duront sia entira veta.
Vic Hendry ei semaridaus cun la Zaria Venzin ed ha giu quater affons, dils quals il pli giuven, il Martin, ei ius vi tier Niessegner cun biabein vegn onns - quei ch'el ha maina surventschiu.
Baul e tard e pli e pli ha Vic Hendry scret raquens e romans e historias entiras. Culs onns eis el daus vid las historias cuortas ed ha anflau dapli suatientscha.
Atras ses texts sefan adina puspei danovamein las enzennas tenor l'experienza da mintga di.
Hendry, Vic. Jeu. 1984 / Tujetsch - Igl andament da sia historia 1987 Vischnaunca Tujetsch pag. 666