En memoria
En memoria dil scribent Vic Hendry (1920 – 2014)
da Arnold Spescha – ella Quotidiana dils 16 da schaner 2015
«Jeu sun staunchels»
Gie, quels plaids has Ti detg, preziau e car Vic, la davosa gada che nus vein telefonau in cun l’auter, leu l’entschatta da december. Ti eras aunc buca seremess dil cumiau da Tia cara consorta Zaria ch’ha bandunau il terrester ils 10 d’october. Jeu vevel aunc mai udiu da Tei il plaid «staunchel». Ti ch’has luvrau e barhau ina veta ora naven dall’alva tochen la brina. Co vesses Ti saviu far auter cun Tia catla tgemblada d’engaschi per Tia clamada, per Tia famiglia e per la litteratura e la cultura romontscha. Il scribent franzos Antoine de Saint-Exupéry ha detg ch’ins stoppi schar anavos fastitgs, buns fastitgs. Quei has Ti fatg, cun Tia persuna e Tia ovra. Ti, in dils gronds scribents romontschs ed in carstgaun amicabel e beinvulent.
Staziuns da Tia veta
Ti eis naschius ils 18 d’uost 1920 a Cavorgia/ Tujetsch en ina famiglia da purs sco secund davos dils 11 affons da Giachen Martin Hendry e da Barla Catrina, nata Peder, da Selva, d’in bab «temprau e da paucs plaids» e d’ina mumma «migeivla e seriusa e cun ina vusch spir miedi e modulatura». Era il liug, Cavorgia, ha marcau e bullau Tei. «Ins sa ir schi lunsch sco ins vul, ins vegn mai da sedistaccar dil tratsch ch’ha dau ad ins igl emprem suttapei», has Ti detg en in discuors. Ti has frequentau la scola primara a Cavorgia e la secundara a Camischolas, «ell’universitad da Camischolas, tier Sep Mudest Nay», sco quei che Ti schevas. Ti eis vegnius scolast primar e secundar, has dau scola a Selva, Camischolas e Sedrun ed eis lu setratgs igl onn 1960 cun la famiglia – cun Tia dunna Zaria e Vos quater affons Gion, Selma, Marcus e Martin – a Schaffusa, nua che Ti has instruiu ella scola secundara tochen Tia pensiun 1985. «Schaffusa ha fatg bein a mi», has Ti ofniau, «schegie ch’igl ei buca stau lev per mei da bandunar la patria, la Val Tujetsch. Sas, en sesez hai jeu adina schau encrescher per mia val e sun restaus in Tuatschin tochen orasum la detta-pei. Jeu traplel memez traso en las veglias passidas, quellas che meinan tuttas sur ils piogns differents encunter casa.»
Tgi che vul saver dapli da Tia veta e mirar davos ils datums ed ils fatgs, duei leger «Cun l’auter a pèr» (Tschespet 62, 1991), Tia autobiografia, scretta cun ina aviartadad e sinceradad surprendenta. Ti eis buca senuspius da mussar Tes patratgs e sentiments, eis «sespogliaus» ed has mussau il bi e mitgiert, il legreivel e trest. Era sche quei ei stau riscus. «Rasar ora ils sentiments ei ina resca.»
La melanconia
Ein la mort prematura da Tiu bab – Ti vevas 14 onns – ni la mort da Tia sora veglia cun 27 onns stadas la raschun, pertgei che Ti has scret ad in scriver? Forsa eis ei era stau igl ambient da Cavorgia, dils umbrivauns. Ni eis ei stau ina certa melanconia da natira che ha stuschau Tei da tedlar e mirar, da reflectar e da raquintar davart destins dils paupers e fleivels? Jeu hai resentiu Tei sco carstgaun pensiv e contemplativ. E jeu vevel bugen quei Vic che mirava magari in’uriala sin ins avon che rispunder. Era Tes texts portan savens la tezla dalla melanconia, han la colur digl umbrivaun e l’odur dalla tristezia. Igl ei in motiv empalont en la gronda cumposiziun da Tia ovra. Mo Ti has era duvrau la forza dalla glisch per viver e Tes screts ein buca senza sulegl e speronza. Ni cun Tes agens plaids en l’introducziun dil cudisch da poesias «Paun cucu» che caracteriseschan forsa Tia ovra entira: «Sch’igl ei è buca clarezia; in pèr radis da glisch sefan tuttina da zanunder. Ed igl ei glisch avunda per semantener.» (7) Ti scrivessies magari bugen in tec pli legher, has Ti detg inaga, denton: «Ins sa buca scriver da quei ch’ins ei buc. Era jeu stoi esser sco jeu sun. E cun scriver hai jeu saviu secumblidar.»
In’ovra immensa e multifara
Tia ovra, preziau Vic, ensiara ils pli differents geners ed ei d’ina diversitad surprendenta. Ella tonscha naven dalla skizza e dil raquent cuort tochen al roman, naven dallas praulas tochen ad ovras historicas, presenta diaris, in’autobiografia ed autras biografias, ensiara texts biblics e socio-culturals. Ti has scret pil radio, per cudischs da scola e numerusas contribuziuns per calenders e periodicas. E buca d’emblidar Tia lirica, Tias translaziuns, Tias columnas e Tias ulteriuras contribuziuns schurnalisticas. In generalist par excellence! Entginas da Tias ovras ein era vegnidas translatadas en tudestg ed han contonschiu aschia in publicum ordvart igl intschess romontsch. Jeu sai buca con che Ti has scret, quei ei buca decisiv, impurtont ei tgei che Ti has scret e co. Ti has enrihiu la litteratura romontscha pertuccont cuntegn e fuorma.
Temas dil vargau e dil present
Ils temas che Ti has tractau pertuccan il carstgaun e sia cundiziun humana. Ch’ei setracti dil Pieder de Pultengia (1964), d’Il fegl digl anticrist (1967) ni d’Ils Saracens che vegnan (1974), dalla Dunna Lipana, dalla parsura ni dalla zuclera: Tuts ein carstgauns e «Tuts maglian ord la medema scadiala», sco quei che Ti has dau num al davos portret da En schurnada (1983). Quei ei nies destin, igl esser human. E Ti has giu bugen il proxim, il permer carstgaun, per duvrar in da Tes plaids preferi.
Ti eis sefatschentaus cun las valurs tradiziunalas dalla societad e cul svilup ed ils basegns da nies temps. Cun la midada da domicil da Sedrun a Schaffusa ei la paletta seslargada. Tiels cuntegns che pertuccan oravontut il mund dil pur e dil pastur e persunas e fatgs historics, has Ti tractau temas e problems da nies temps, cunzun da caracter social. Ti dedescrivas humans en lur lutga da viver e surviver, il carstgaun el cumbat cun sesez e culs auters, la solitariadad, la sexualitad, la religiun, temas ed anguoschas, melanconia e brama. E Ti eis buca senuspius dad ir vias radicalas per esser autentics e saver porscher litteratura nova als Romontschs. Ti eis schizun ius da libra voluntad en perschun per saver scriver Tiu diari Discuors cugl assassin (1970).
Il lungatg hendryan
Las empremas ovras, sco per semeglia Tia veglia daventi (Tschespet 36, 1957), has Ti scret en la moda tradiziunala e convenziunala dil temps. Ti duvravas in lungatg pulpiu, decorau e cargau. «Jeu s’entusiasmavel per plunas da plaids, erel eivers da locuziuns e construcziuns », has Ti detg inaga. «Il lungatg era per mei in’orgla, e jeu level trer tut ils registers da quella.» Mo lu has Ti midau canzun ed has entschiet pli e pli a trer naven quei ch’era danvonz, il ballast, has encuretg novas proporziuns, la mesira; Ti has reduciu ed abstrahau, has desistiu da plaids isai, eis daventaus spargnus e concis, eis serestrenschius agl essenzial.
En Tias historias cuortas has Ti mess novs accents da cuntegn e da fuorma, per semeglia en Riccarda (1967), en Batterdegls (1980), Passidas (1981), En schurnada (1983), ed eis daventaus in meister dil raquent cuort. Ti eis sestentaus pil plaid precis cun sia muntada e sias connotaziuns che vibreschan e colureschan la muntada fundamentala sco ils tuns harmonics en la musica. La midada da Sedrun a Schaffusa ha gidau leutier: la distanza, l’indipendenza, la libertad pli gronda, la sentupada cun autra glieud, cun auters munds, cun autras tematicas, baghegiond sin vegls e novs suloms.
«Miu stil ei persunals, el s’auda a mi», has Ti detg. Quei constat, il stil hendryan ei nunconfundibels. Ti has creau e duvrau Tiu lungatg, che nus seigien promts e stgis da suandar e capir ni buc. Ti has tschercau ils plaids, has fatg diever dils numerus registers dil vocabulari e nutriu tez quel. Ins legia buca Vic Hendry sco da beiber aua. Ti vul ch’ins sestenti, ch’ins legi e forsa relegi. Ti eis ius Tia via, dil scars, dil tagl, senza remischun. Quei ei Tia fermezia e nossa sfida.
«Asemper resta il plaid»
Vic, Ti has publicau pér cuort avon che passar la sava dils 70 Tiu emprem cudisch da poesias: Paun cucu (1990). Cun la poesia has Ti saviu cuntinuar cul process da concentraziun, ni cun Tes plaids el Calender Romontsch 2001: «Jeu vai entschiet a scursanir, la construcziun ei secristallisada. Adina pli e pli. Il process ha cuzzau ditg, entochen oz. Pér cu tut il maniclem danvonz ei staus bess giuadora – pér lu vai jeu entschiet a saver far poesias, maletgs che dian dapli ch’ils plaids sin las lingias. Scursaness jeu vinavon, fuss jeu giu sigl ies blut, in ies ch’entschevess a far mal.»
Tia lirica ensiara visiuns, experientschas e regurdientschas, muments e sentiments. E Ti reflecteschas davart senn e valzen dalla lirica en «Mias poesias »: «…vonzeivi/podà in/pauper sbittau/ che pren si/e tegn/silmeins ina/en salv».
Era Tiu secund tom da poesias Auras (1995) dat perdetga da Tia forza poetica e da Tia sensibilitad. Ti idealiseschas nuot, buc il tschespet patern, buc il vargau e buc il present. Ti numnas las caussas pil num. Il bi e tschei. Legria ei legria e dolur ei dolur. Semplamein aschia. Sco sch’ei secapess da sesez. Senza glorificar. Senza reproscha. E senza cumpassiun cun sesez: «ti/po cali da ver malpuccau/ ti eis buca schi impurtonts» (26). Ti has saviu ch’ins sto dumignar quei ch’ei e quei che vegn. Senza engurgnientscha e senza plirar dis Ti: «danvonz e persuls jeu stoi dumignar/il toc aunc che vonza da caminar». (12) Ti has giu in bienton da dumignar. Jeu patratgel vid la mort da Tiu fegl Martin, in destin ch’ha sdernau Tei, ina dolur che Ti has empruau da superar cun scriver il cudisch Brevs passas (1984).
Preziau Vic, Ti eis in um da plaid e dil plaid. Il plaid che Ti has tschercau cun quitau, il plaid ch’ei ius a cor. Ti has priu cumiau da quest mund, mo Tiu plaid vegn a restar. En «Anemona alva» (2007) secatta ina da mias poesias preferidas:
«Asemper resta il plaid
il plaid mess giu cun il cor
scol tratsch ch’ei gruls en las travs
e dat la forz’al garnetsch
e paun al pauper carstgaun
asemper resta il plaid».
«Empau ei empau»
Ei fuss aunc bia da dir da Tei, sco per semeglia da Tia gronda lavur sco cronist e publicist, da Tias columnas nunconfundiblas, cunzun per La «Gasetta Romontscha» e La Quotidiana, da Tiu engaschi sco president dall’Uniun da scripturas e scripturs romontschs e dalla Quarta Lingua
e da bia auter. Ti has era retschiert differents premis: dall’Uniun da scripturas e scripturs romontschs, dalla Casa editura Fontaniva, duas gadas in premi Schiller, il premi CRR, in premi da renconuschientscha dil cantun Grischun ed igl onn 2001 il Premi grischun da cultura. E Tia vischnaunca nativa ha numnau Tei burgheis d’honur. Mo uss schesses Ti: «Empau ei empau», sco quei che Ti has detg alla fin dil film impressiunont ch’Arnold Rauch ha fatg sur da Tei igl onn vargau per la Televisiun Rumantscha.
Stai bein, bien amitg
Ils 17 da december 2014 eis Ti suandaus Tia cara consorta Zaria. Jeu prendel cumiau da Tei, bien amitg, cun grond respect da Tei e da Tia ovra ed engraziel a Ti per Tia cordialitad ed amicabladad. Quei fetschel jeu cun la poesia che Tia famiglia ha eligiu per annunziar Tiu cumiau:
«zacu inagada
avon che jeu vomi
jeu less pertscheiver
ils radis che tremblan
osum la candeila
las larmas che neschan
caschunan legria
che bognan las crustas».
Arnold Spescha
Necrlog da Mevina Puorger Pestalozzi
Nachruf – Zum Tode des Schriftstellers Vic Hendry
