Per ses navonta

Vic Hendry sils navonta (mc)
Per ses navonta
Oz festivescha il scribent sursilvan e romontsch Vic Hendry, oriunds da Cavorgia/Tujetsch e sesents dapi 50 onns a Schaffussa, siu 90avel anniversari. En La Quotidiana dad oz renda Arnold Spescha omagi al scribent tuatschin che ha scaffiu ina ovra litterara immena e multifara en lungatg romontsch. Diversas da sias ovras ein era vegnidas translatadas en tudestg ed en auters lungatgs. Per la pressa romontscha, cunzun per la «Gasetta Romontscha» e per La Quotidiana ei Vic Hendry staus in collaboratur fidau ed attaschau duront biars decennis. La Quotidiana renda omagi al giubilar cun la publicaziun da siu roman «Ils Saracens vegnan», che ei cumparius 1974 ella casa editura Desertina a Mustér, sco fegliet. Al giubilar admetta era La Quotidiana buns auguris per siu anniversari. Igl onn 2001 ha il cantun Grischun surdau Vic Hendry il Premi grischun da cultura en renconuschientscha da sia ora litterara ordvart vasta ed impurtonta ed en undrientscha da ses gronds merets per la promoziun dil lungatg e dalla cultura romontscha.

Vic Hendry festivescha ils 90
„Dabia deriva neu da Cavorgia“
Da Arnold Spescha

Preziau e car Vic, jeu seregordel aunc bein: Nossas vias eran gia secruschadas, denton s’entupaus cun Tei per propi sun jeu l’emprema gada en ina brev che jeu hai survegniu da Tei. E quella ha muentau e fatg impressiun: la biala scartira, ina cordialitad nundetga e patratgs ch’ein stai per mei ina clav custeivla ed impurtonta per capir meglier Tei e Tia ovra. Pli tard essen nus s’entupai si Cavorgia. Nus vevan legiu en ina classa dalla Scola cantunala Tias Verduras dalla notg e vein lu fatg in «pelegrinadi» en Tiu liug da naschientscha. E la gronda surpresa per las scolaras ed ils scolars : Ti eras leu (buca per schabetg) ed has beneventau nus avon Tia casa paterna. «Sin quei terren greppus osum la greppa sun jeu staus da casa, en la casa vedra da miu bab e da mia mumma», has Ti detg e Ti has raquintau ed explicau e schau capir. E las scolaras ed ils scolars eran entusiasmai da quei um plein vitalitad, cun sia viarva culonta e siu humor decent – en cuntrast cul lungatg gigin e scars e la melanconia ch’els vevan entupau els raquens culs destins da carstgauns dalla vart umbrivauna dalla veta.

Da sia veta
Naschius ils 18 d’uost 1920 a Cavorgia/Tujetsch en ina famiglia da purs sco secund davos dils 11 affons da Giachen Martin Hendry e da Barla Catrina, nata Peder, da Selva. Scola primara a Cavorgia e secundara a Camischolas (tier Sep Mudest Nay). Seminari da scolasts a Cuera. Studis allas universitads da Friburg, Turitg e Milaun. Scolast secundar per lungatgs e historia. Dau scola a Selva, Camischolas e Sedrun. Igl onn 1960 ei la famiglia – cun la dunna Zaria, nata Venzin, ed ils affons Gion, Selma, Marcus e Martin – setratga a Schaffussa, nus che Vic Hendry ha instruiu en la scola secundara tochen sia pensiun igl onn 1985. El ei plinavon staus president dall’Uniun da scripturas e scripturs romontschs e dalla Quarta Lingua.

Davos quellas staziuns sederasa ina veta tgemblada da lavur per sia clamada, per sia famiglia e per la litteratura e la cultura romontscha. Tgi che vul saver dapli, duei leger Cun l’auter a pèr (Tschespet 62, 1991), l’autobiografia da Vic Hendry, scretta cun ina aviartadad e sinceradad surprendenta. El ha adina mussau ses patratgs e ses sentiments, el ei «sespogliaus» ed ha mussau il bi e mitgiert, il legreivel e trest. Era sche quei ei riscus. «Rasar ora ils sentiments ei ina resca.» (225) Biars tratgs e detagls pertuccont veta ed ovra intervegnan ins era dall’intervesta detagliada ed informativa d’Isidor Winzap cun Vic Hendry per ses 80, cumparida el Calender Romontsch 2001.

Cavorgia
Igl onn 2001 ha Vic Hendry survegniu il Premi grischun da cultura. Mariano Tschuor ha introduciu sia Laudatio pigl undrau – «Ins sa da tgei pasta ch’ins ei» – culs plaids: «Mit Verlaub: Cavorgia ist ein Kaff.» E suenter in excurs reussiu e spirtus tras veta ed ovra digl undrau concluda el culs plaids: «Und jedem, der es hören möchte, sage ich: ab heute, spätestens ab heute ist Cavorgia kein Kaff mehr.»

«Dabia deriva neu da Cavorgia», ha Vic Hendry detg inaga. Cavorgia, l’ucliva da mann sut culs seniasters e las cavorgias ha marcau e bullau el per veta duronta. Era sch’el ei «ruts ora» cun 40 onns ed ei serendius ella Bassa, eis el restaus fideivels a sia val ed ei adina puspei turnaus anavos cul patratg ed en realitad els encardens dils da «Maunsut», quei mund che «ha formau il carstgaun viv, spert, precipitau, entusiasmau, pensiv, aviarts per mintga misteri dalla natira, mo ordvart vulnerabels. In da quels dils uclauns ch’ils da vitg dostan dalla cuminonza gronda e che ston ir lur sendas, meinsvart stentusas», sco quei ch’Alexi Decurtins ha scret en sia gratulaziun pils 70 digl autur. Ed Isidor Winzap ha nudau 1999 en «La Tuatschina»: «Cheu ha el saviu viver sia veta e guder la retratgadad, la tgeuadad, mo era stuiu sedustar encunter vents pli crius, nevaglias e cuflaus. Quei ha denton marcau ed influenzau el; el ei daventaus luvrus, lingiers, endinaus, perseveronts e resistibels, mo era pensivs e vulnerabels.» Ed jeu sai aunc seregurdar d’ina construcziun ch’il Vic ha detg il di che nun essen s’entupai cun el a Cavorgia: «Jeu. traplel memez traso en las veglias passidas, quellas che meinen tuttas sur ils piogns differents encunter casa.» Ed el ha detg ch’ils uauls spess e stgir-verds siarien giu bein da tuttas quater varts e mirien dalla glieud e dils tiers dall’ucliva, dettien schurmetg e laschien trer flad. E buca daditg ha el scret a mi: «Il vischinadi ei staus mia preit e las largias digl uaul ein segidadas da trer flad.» Gie, igl uaul! En Cun l’auter a pèr di el: «La vusch dil dutg e quella digl uaul ein stadas miu cant gregorian.» (41)

Ed ils carstgauns da Cavorgia, ils plitier ed era tschels, ils vischins, han marcau el. Siu bab eri «in um temprau e da paucs plaids», sia mumma «ina femna d’ina ‚mieivladad‘ seriusa e d’ina vusch spir miedi e modulatura. Enten mei ein sias canzuns dadas ualti afuns. Probablamein vai jeu empriu dad ella, da mia mumma, da veser e da tedlar», ha el scret dacuort. La descripziun da res geniturs ei ina cumposiziun cun biaras e bialas variaziuns.

La spina ella spatla
Ei la mort prematura dil bab da Vic Hendry – el veva 14 onns – e la mort da sia sora veglia cun 27 onns, omisdus ein morts enteifer diesch meins, stadas la spina ella spatla, per duvrar in maletg da Gion Deplazes, il motiv pertgei che Vic Hendry ha scret ad in scriver, pertgei ch’el ha stuiu scriver? Ni eis ei stau ina certa melanconia da natira che ha stuschau da tedlar e mirar, da reflectar e da raquintar davart sorts e destins dils paupers, fleivels e munglus? Ni eis ei stau igl ambient da Cavorgia, dils umbrivauns? Ses texts tunen savens en mol, han la colur digl umbrivaun e l’odur dalla tristezia, els ein denton buca senza sulegl e speronza. Ni cun ses plaids en l’introducziun da siu cudisch da poesias Paun cucu che caracteriseschan l’emprema gruppa e forsa sia ovra entira: «Sch’igl ei e buca clarezia; in per radis da glisch sefan tuttina da zanunder. Ed igl ei glisch avunda per semantener.» (7) El scrivessi magari bugen in tec pli legher, ha il Vic detg inaga, denton: «Ins sa buca scriver da quei ch’ins ei buc. Era jeu stoi esser sco jeu sun.» El hagi dus mauns seniasters ed emprovi aschia cun scriver da s’avischinar als concarstgauns. E cun scriver hagi el saviu secumblidar.

In’ovra immensa e multifara
L’ovra litterara da Vic Hendry ensiara ils pli differents geners ed ei d’ina diversitad surprendenta. Ella tonscha naven dalla skizza e dil raquent cuort tochen al roman, naven dallas praulas tochen ad ovras historicas, presenta diaris, in’autobiografia ed autras biografias, ensiara texts biblics e socio-culturals. El ha scret pil radio e Radioscola, per cudischs da scola e numerusas contribuziuns per calenders e periodicas. E buca d’emblidar sia lirica, sias translaziuns e sias numerusas contribuziuns schurnalisticas. In generalist par excellence! Entginas da sias ovras – prosa e poesia – ein era vegnidas translatadas en tudestg (oravontut da Bernhard von Arx) e contonschan aschia in publicum ordvart la tiara romontscha.

Quell’ovra immensa ch’ensiara bia tuns, odurs e savurs ha Theo Candinas caracterisau en moda poetica en siu omagi a Vic Hendry per siu 80avel natalezi: «… quei che stat ei igl aroma e la savur aschi varionta da quei che Ti has giu da porscher al lectur sur decennis alla liunga. Igl ei ina variaziun quasi illimitada dad odurs, da colurs e da fuormas atras tut las stagiuns vegetablas, mo ins senta era il freid e la purgina dalla stagiun morta. En mintga caraun da Tia senda litterara, ed ei dat biars da quels, vegn ins surprius d’ina nova odur, da tschiens colurs e dalla vesta en in mund resch niev che Ti discuvieras.»

Temas digl ier e digl oz
Ils temas che Vic Hendry tracta ein multifars sco las fuormas ch’el elegia e
pertuccan il carstgaun e sia cundiziun humana. Ch’ei setracti dil Pieder de
Pultengia (1964), dil fegt digl anticrist (1967) ni d’Ils Saracens che vegnan (1974), dalla Dunna Lipana, dalla Giuanna, dalla parsura ni dalla zuclera: Tuts ein carstgauns e «Tuts maglian ord la medema scadiala», sco quei ch’igl autur ha dau num al davos portret da En schurnada (1983). Quei ei nies destin, igl esser human. E Vic Hendry ha bugen il carstgaun, il permer carstgaun, per duvrar in da ses plaids preferi.

Cun la midada da domicil da Sedrun a Schaffussa ei la paletta dils temas tractai da Vic Hendry seslargada. Tiels cuntegns che pertuccan oravontut il mund dil pur e dil pastur e persunas e fatgs historics, s’aschuntan temas e problems da nies temps, cunzun da caracter social. El descriva humans en lur, lutga da viver e surviver, il carstgaun el cumbat cun sesez e culs auters, la solitariadad, la sexualitad, la religiun, temas ed anguoschas, melanconia e brama. Ed ins ha l’impressiun che quei ch’el scrivi seigi verdeivel. El ei buca senuspius dad ir vias pli radicalas per esser autentics e saver porscher als Romontschs litteratura nova. El ei schizun ius en perschun ed ha viviu la veta da perschunier per saver scriver siu diari Discuors cugl assassin (1970).

Iso Camartin ha caracterisau l’ovra da Vic Hendry en ina brev (2001) denter auter sco suonda: «Den Themen der Moderne — zumal dem Konflikt zwischen traditionellen Wertvorstellungen und den Bedürfnissen der Gegenwart —hat Hendry sich immer wieder gestellt. Aussenseiter der Gesellschaft spielen bei ihm eine wichtige Rolle, auch in historischer Perspektive hat er sich mit Figuren beschäftigt, die eine gewisse ethische Ambivalenz auszeichnet. Man darf ohne zu übertreiben sagen, dass die bündnerromanische Gegenwartsliteratur durch das Werk von Vic Hendry eine wichtige künstlerische Bereicherung erfahren hat. … Vic Hendry gehört zu einer aussterbenden Spezies von Unermüdlichen. Seine Bereitschaft thematisch und formal mit der rasch sich verändernden Zeit Schritt zu halten, hat mich immer erstaunt und beeindruckt.»

Dil nutriu e pulpiu al strebel e scars
Las empremas ovras, sco per semeglia Tia veglia daventi (Tschespet 36,1957), ha Vic Hendry scret en la moda tradiziunala e convenziunala dil temps, pertuccont cuntegn e stil. El duvrava in lungatg pulpiu, decorau e cargau. El s’entusiasmavi per plunas da plaids, eri eivers da locuziuns e construcziuns, ha el detg inaga. Mo lu ha el entschiet pli e pli a trer naven il ballast, ha encuretg novas proporziuns, la mesira; el ha reduciu ed abstrahau, ha desistiu da plaids isai, ei daventaus spargnus e concis, ei serestrenschius al minimum, agl essenzial.

En sias historias cuortas metta el novs accents da cuntegn e da fuorma, per semeglia en Riccarda (1967), en Batterdegls (1980), Passidas (1981), En schurnada (1983), e daventa in meister dil raquent cuort. El sestenta pil plaid gest, pil plaid cun sia muntada e sias connotaziuns che vibreschan e colureschan la muntada fundamentala sco ils tuns harmonics en la musica. La midada da Sedrun a Schaffussa ha gidau leutier: la distanza, l’indipendenza, la libertad pli gronda che quella dalla stretga patria, la sentupada cun autra glieud, cun auters artists e litterats, cun auters munds, cun autras tematicas, baghegiond sin vegls e novs suloms.

«Miu stil ei persunals, el s’auda a mi», ha el detg inaga. Quei constat, il stil hendryan ei nunconfundibels. El drova siu lungatg, che nus seigien promts e stgis da suandar e capir ni buc. Siu scazi da plaids ei voluminus e multifars. El elegia ses plaids, fa diever dils numerus registers dil vocabulari e nutrescha sez il vocabulari. El ei pretensius. Ins legia

Buca Vic Hendry sco da beiber aua. El vul ch’ins sestenti, ch’ins legi e forsa relegi. El ei ius sia via, la via dall’abstracziun, dil scars, senza remischun. Quei ei sia fermezia e nossa sfida.

La lirica
Cuort avon che passar la sava dils 70 ha Vic Hendry publicau siu emprem cudisch da poesias: Paun cucu (1990). Tard. Ins ei denton buca surstaus. Sia aveina lirica ei gia semussada avon. En l’introducziun dil Tschespet 36.(1957) cun raquintaziuns da Ludivic Hendry; scriva il redactur Gion Deplazes: «Sia prosa ei de tempra lirica…. L. Hendry ha era fatg poesias, untgescha denton ritmida e metrica. El tscherca plitost de sponder empau poesia ella prosa e de schar il far poesias als auters‘.» (XIII/XIV)

El Calender Romontsch 2001 di Vic Hendry: «Jeu vai entschiet a scursanir, la construcziun ei secristallisada. Adina pli e pli. Il process ha cuzzau ditg, entochen oz. Per cu tut il maniclem danvonz ei staus bess giuadora – per lu vai jeu entschiet a saver far poesias, maletgs che dian dapli ch’ils plaids sin las lingias. Scursaness jeu vinavon, fuss jeu giu sigl ies blut, in ies ch’entschevess a far mal.» (140)

«La sera scusa
mintgamai las cusadiras
ed ellas teilas blauas
che dattan afuns
sezuppan ils sbrenzels
dil tschiel stelliu … » (13)

Cun quels plaids entscheiva il cudisch Paun cucu e cuntinuescha cun visiuns, experientschas e regurdientschas, muments e sentiments. Ed igl artg siara cun la damonda dil senn e valzen dalla lirica en «Mias poesias»:
«.., vonzeivi
podà in
pauper sbittau
che pren si
e tegn
silmeins ina
en salv» (181).

Igl onn 1995 ei il secund tom da poesias da Vic Hendry cumparius: Auras. Flurin Spescha ha vertiu las poesias en tudestg: Windzüge. Il cudisch dat perdetga dall’originalitad e forza poetica digl autur e dalla sensibilitad e perfecziun dil translatur. Vic Hendry idealisescha nuot, buc il tschespet patern, buc il vargau e buc il present. El numna las caussas pil num. Il bi e tschei. Legria ei legria e dolur ei dolur. Semplamein aschia. Sco sch’ei secapess da sesez. Senza glorificar. Senza reproscha. E senza cumpassiun cun sesez:
«ti
po cali da ver malpuccau
ti eis buca schi impurtonts» (26).

El sa ch’ins sto dumignar quei ch’ei e quei che vegn. Senza engurgnientscha e senza plirar di el:
«danvonz e persuls jeu, stoi dumignar
il toc aunc che vonza da caminar». (12)

Jeu numnel aunc Anemona alva (2007), in ciclus da 20 poesias, translatadas en tudestg da Mevina Puorger, en talian da Marisa Keller-Ottaviano ed en franzos da Jean-Jacques Furer. Mevina Puorger scriva egl Epilog: «Il ciclus poetic commouva cun sia gronda calma e natüralezza, culla quala i vain disegnada la fin da noss dis. Il cumgià, la mort, las glümeras, anguoschas illa not, algord ed ouvra dal poet da la Surselva.» (51) En sia recensiun scriva Renzo Caduff che quellas poesias relatien «d’ina veta vivida» e cuntinuescha: «Aschia, entscheiva il ciclus cun ‚zacu inagada/avon che jeu vomi/jeu less pertscheiver‘ e finescha culla poesia ‚guilas melnas crodan/sco’l sablun dall’ura. L’entschatta cuntegn la speronza dad aunc capir in stel dapli la marveglia dalla veta. La fin dil ciclus lai presentir l’idea dalla mort cullas guilas melnas „dil larisch che crodan, mo era ina cuntinuaziun dalla veta cullas guilas verdas che vegnan puspei a catschar la primavera.» (LQ, 26-102007)

Il cronist e correspondent
Ei fuss bunamein in puccau da tralaschar d’allegar la gronda lavur da Vic Hendry sco cronist e publicist. Gia en giuvens onns ha el rapportau davart sia Val Tujetsch en numerus artechels pil «Bündner Tagblatt» cul pseudonim Martin Busch: Die Dorfschaft Cavorgia, Aus dem Tavetschertal, So weiss wird mein Tal, Des elften Monats stille Betrachtungen etc. El s’interessava per la cultura e la cultira, per la politica e pil svilup dalla vallada. El ha dau entscheins a sia val, fatg reclama. Ed el ha scret per la «Gasetta Romontscha» e per «La Quotidiana» numerus rapports, artechels, gratulaziuns e necrologs. E columnas, era quellas nunconfundiblas, originalas, pretensiusas. El fussi vegnius bugen schurnalist, ha Vic Hendry palesau inaga. «Ed jeu creiel strusch ch’el hagi inagada dau canaster, cu zatgi ha tratg ad el per la mongia, dumandond per la menziun publica», ha Giusep Capaul scret, cu siu amitg ha giu 70. Ed il Vic hagi era cuntinuau, cura ch’el seigi emigraus a Schaffusa. E Giusep Capaul resumescha: «Ers sco publicist ha el acquistau in plaz denter ils megliers.»

Undrientschas e premis
Vic Hendry ha retschiert differents premis: Premis dall’Uniun da scripturas e scripturs romontschs, duas gadas in premi Schiller, in premi dalla Casa editura Fontaniva, il premi CRR, in premi da renconuschientscha dil cantun Grischun ed igl onn 2001 il Premi grischun da cultura «en renconuschientscha da sia ovra litterara ordvart vasta ed impurtonta ed en undrientscha da ses gronds merets per la promoziun dil lungatg e dalla cultura dils Romontschs.»

«Asemper resta il plaid»
Car Vic, oz astgas Ti festivar ils 90. E quei en buna sanadad da tgierp e spert, era sch’ei dola magari e fa dar is. Gauda il di da fiasta ensemen cun Tia cara consorta Zaria e Vos affons e lur famiglias. Biars patratgan oz vid Tei, gratuleschan ed engrazian a Ti per tut quei che Ti has dau cun Tias ovras e per Tia cordialitad ed attaschadadad. Jeu sun segirs che biars vegnan era a scriver a Ti. Jeu sai, Ti has scret, nundumbreivlas brevs a biars amitgs ed enconuschents. Quellas persulas ein gia in scazi prezius.

Sche jeu fuss oz en Tia vischinonza, schess jeu: Vic, legia ina da Tias historias cuortas. Cu Ti legias — cun Tia vusch, cun Tia fatscha, cun Tes egls, cun tut Tiu esser — survegn Tiu text ina dimensiun supplementara. El vibrescha e captivescha.

Ti eis in um da plaid e dil plaid. Il plaid che Ti has tschercau cun quitau, il plaid ch’ei ius a cor. E gest sco il tratsch dat la forza al garnetsch e paun al carstgaun, ei il plaid vivonda pil cor, il plaid mess giu cul cor. E quei plaid vegn a cuzzar: Asemper resta Tiu plaid. Cun ina da mias poesias preferidas ord Tiu cudisch Anemona alva selegrel jeu cun Tei e tarmettel a Schaffussa mes pli cordials salids e buns giavischs.

Asemper resta il plaid
il plaid mess giu cun il cor
scol tratsch ch’ei gruls en las travs
e dat la forz’al garnetsch
e paun al pauper carstgaun
asemper resta il plaid
(Anemona alva, 2007, 38)

Vic Hendry ist infiziert – auch noch mit 90
Der romanische Schriftsteller Vic Hendry kann heute in Schaffhausen seinen 90. Geburtstag feiern – und auf ein überaus reiches literarisches Schaffen zurückblicken. Aus diesem stechen vor allem seine Kurzgeschichten hervor.
Von Pieder Caminada

Tujetsch/Schaffhausen. – «Der 1920 in Cavorgia/Tujetsch als zehntes Kind eines Bergbauern geborene Vic Hendry ist wohl einer der experimentierfreudigsten und eigenwilligsten Schriftsteller aus der Surselva.» Im Grunde genommen sagt diese Charakterisierung im Standardwerk «Die Rätoromanen – ihre Identität in der Literatur» von Gion Deplazes bereits alles über Vic Hendry. Wer aber 90 Jahre alt wird, 2001 «für sein bedeutendes literarisches Werk» mit dem Bündner Kulturpreis ausgezeichnet wurde und zweifacher Preisträger der Schweizerischen Schillerstiftung ist, hat an dieser Stelle schon ein paar Zeilen mehr verdient.

Erschlagende Sprachgewalt
Experimentierfreudig und eigenwillig – das ist Vic Hendry auf jeden Fall. Und er hat seinen Lesern nicht immer leichte Kost vorgesetzt. Als der Verfasser dieser Zeilen sich vor Jahren einmal an einem typischen Hendry-Buch versuchte, musste er nach weniger als 50 Seiten aufgeben. Zu wortgewaltig und vielschichtig war das Werk, als dass er den Inhalt noch hätte erfassen können.

Der Meister der Kurzgeschichte
Aber Hendry konnte auch anders. Als er Ende der Vierzigerjahre seine ersten literarischen Schriften veröffentlichte, pflegte er noch eine realistische Erzählprosa. Erst in den Siebzigerjahren wechselte er dann seinen Stil, wie Gion Deplazes in seinem vorhin erwähnten Buch schreibt: «Seine Prosa wurde nun knapper, gelegentlich sprunghaft.»
Es gibt kaum eine literarische Gattung, an der Hendry sich nicht versucht hätte. Wer seine Bibliografie überfliegt, findet Romane, Geschichten, Erzählungen, Märchen, Gedichte, Essays, Porträts. Und vor allem Kurzgeschichten. Nicht zuletzt wegen deren Qualität wird er als «Meister der Kurzgeschichte» bezeichnet.
Dass Hendry sich schwergewichtig der Kurzgeschichte verschrieb, hatte wohl auch mit seinem Beruf zu tun. Nach dem Sekundarlehrerdiplom unterrichtete er kurze Zeit in seiner Heimat, bevor es ihn 1960 nach Schaffhausen zog, wo er bis zu seiner Pensionierung als Lehrer wirkte. Dass neben dem Unterrichten Nicht immer Zeit für dicke Romane blieb, liegt auf der Hand.

Sogar freiwillig ins Gefängnis
Aber Hendry machte es sich beim Schreiben nicht etwa einfach. Im Gegenteil: Für seinen Roman «Discuors cugl assassin» (Gespräch mit dem Mörder) ging er sogar freiwillig ins Gefängnis, um sich in die Figuren hineinversetzen zu können. Und als er Ende der Neunzigerjahre zum ersten Mal Märchen schrieb, las er seine Texte in den Schulen von Sedrun und Rueras gewissermassen «dem lebenden Objekt» vor, damit er seine Texte danach noch kindergerecht überarbeiten konnte. Sein damaliges Fazit: «Für diese Art von Texten braucht es eine unglaubliche Klarheit.»

Weit über 6000 Seiten publiziert
Trotz dieses lobenswerten Aufwands und obwohl er die Schriftstellerei gewissermassen «nur» im Nebenamt betrieb, gehört Hendry nicht zu den Autoren, die es gerademal auf eine Handvoll Bücher bringen. Schon bei seinem 80. Geburtstag hiess es, sein literarisches Werk umfasse über 6000 Seiten. Mittlerweile sind noch viele mehr dazugekommen.
Ob es dabei bleibt? Wenn heute Abend die letzten Gratulanten gegangen sind, wird Hendry wohl nochmals in Ruhe auf sein literarisches Schaffen zurückblicken. Und vielleicht packt es ihn dann wieder. Denn Hendry war in Sachen Literatur immer schon ein Infizierter. Und wird es bleiben.